Í Degi og Viku var innslag um kanningarorkuna hjá Heilsufrøðiligu Starvsstovu. Í innslagnum var uppgerð av kostnaðinum fyri koronukanningar hjá Thetis, Heilsufrøðiligu Starvsstovu og Smyril Line gjørd.
Í hesum sambandi ynskja vit frá Thetis at gera vart við, at tølini ikki eru samanbærilig. Ímeðan Heilsufrøðiliga Starvsstovan einans ger greiningar so eru uppgávurnar hjá Thetis meiri umfatandi og fjøltáttaðar. Thetis potar, greinar og er veitari av ymiskum vørum til Sjúkrahúsverkið innan koronutilbúgving. Heilsufrøðiliga Starvsstovan ger bara greiningar.
Tá talan er um uppgerð fyri økið “greiningar” hava Thetis og Heilsufrøðiliga Starvsstova staðið fyri umleið helminginum hvør – har Heilsufrøðiliga Starvsstova tó hevur munin.
Tá Thetis byrjaði at gera greiningar fyri Sjúkrahúsverkið á sumri 2020 var kostnaðurin hjá Thetis lægri enn kostnaðurin hjá Heilsufrøðiligu Starvsstovu. Bæði Thetis og Heilsufrøðiliga Starvsstova hava síðani lækkað prísin á greiningum í 2021. Kostnaðurin fyri kanningar í Føroyum hevur verið munandi bíligari enn í okkara grannalondum.
Við landamarkið valdi Føroyar, at ferðafólk sjálvi rinda fyri kanningarnar – eins og í flest øðrum londum. Tó hevur prísurin fyri hesar kanningar verið munandi lægri í Føroyum enn í flest øðrum londum.
Blíðar heilsanir
THETIS P/F
Hetta er eitt lesarabræv. Meiningar og sjónarmið í lesarabrævinum eigur tann ið skrivað hevur. VP leggur nógv í talu- og skrivifrælsi. Tí eru allar meiningar vælkomnar, bara tær eru innanfyri karmarnar á revsilógini og fjølmiðlaetisku leiðreglunum. VP loyvir í ávísan mun dulnevndum lesarabrøvum, tá veit redaktiónin hvør hevur skrivað.
Um tú veitst okkurt, sum VP ikki veit - skriva so til vp@vp.fo
