Serlæknafelagið vil við hesum skrivi mótmæla, at Kristen Michelsen sum fólkavaldur løgtingsmaður og borgarstjóri á Tvøroyri alment í Dagur og Vika leggur eftir einum av okkara limum og rør uppundir, at yvirlæknin ikki tekur ábyrgd og ger sítt arbeiði til lítar.

Tí eitt er púra vist, at sjúklingar við nýrasjúkum í Føroyum eru ein av best røktu sjúklingabólkum í føroyska heilsuverkinum, hetta hóast vit bert hava tann eina nýralæknan.

Tá sagt verður, at tað skal vera ábyrgdin hjá nýralæknanum á Landssjúkrahúsinum at skipa eitt tilboð um dialysu á Suðuroyar Sjúkrahúsi, so er tað púra burturvið.

Eitt tílíkt framkomið tilboð er ikki bara nakað, ið verður skipað í einari handavend.

At tað nú verður settur ein bólkur at lýsa tørvin og koma við einum boði uppá, hvussu eitt tílíkt tilboð um dialysu á Suðuroyar Sjúkrahúsi møguliga kundi verið snikkað saman, er einasti vegur fram.

So má politiska skipanin eisini taka ábyrgd, um tað vísir seg, at fíggjarligi tørvurin er nógv størri, enn tann eina milliónin, ið er játtað á fíggjarlógini.

Jan Rasmussen
Yvirlækni og formaður í Serlæknafelag Føroya