Floksformenninir hava í dag verið hjá løgtingsformanninum og sagt, hvønn teir vísa á til at leiða samráðingarnar. Teir flestu vístu á formannin í Javnaðarflokkinum, Aksel V. Johannesen, og hann sigur, at hann fer at tosa við fleiri flokkar longu í dag.
Framsókn kom í eina lyklastøðu á valinum seinasta hósdag, tí flokkurin nú hevur trý umboð, og við Kringvarpið sigur Ruth Vang at hon umframt at peika á Aksel V. Johannesen sum samráðingarleiðara, eisini ynskti sær eina samgongu við Sambandsflokkin og Javnaðarflokkin. Tað gera hon, tí hon vil sleppa undan blokkpolitikki í Føroyum.
Aksel V. Johannesen sigur, at hann fyrst fer at tosa við Sambandsflokkin um at gera eina samgongu ímillum Javnaðarflokkin, Sambandsflokkin og Framsókn. Men hann ætlar sær longu í dag eisini at tosa við Tjóðveldi um møguleikarnar har.
Um tú veitst okkurt, sum VP ikki veit - skriva so til vp@vp.fo
