Í januar mánað bórust tíðindi í fjølmiðlunum um, at fleiri læknar høvdu verið fyri ágangi av ymiskum slagi og sendi Læknafelagið, vælskiljandi, út yvilrlýsing, har hesin ágangur var átalaður.
Nú tykist talan at vera um annan ágang:
Undir viðgerðini av uppskotinum um ”Fría fosturtøku” vísti løgtingsmaðurin Helgi Abrahmasen, á, at uppskotið hjá Kára Bjarnason Petersen, í stóran mun var ein avskrift av ásetingini í donsku ”Sundhedsloven”,
MEN, at har var eitt stór undantak, sum ikki er tikið við í uppskotinum hjá landsstýrismanninum, nevnliga, tað sum stendur í grein 102 í ”Sundhedsloven”:
“Læger, sygeplejersker, jordemødre, sygehjælpere og social- og sundhedsassistenter, for hvem det strider mod deres etiske eller religiøse opfattelse at foretage eller medvirke til svangerskabsafbrydelse eller fosterreduktion, skal efter anmodning fritages herfor. Tilsvarende gælder for personer, der er under uddannelse til et af de nævnte erhverv.”
Vælskiljandi spurdi Helgi, hví júst hetta var tikið burturúr, tá man annars hevði nýtt donsku lógina sum fyrimynd.
Eg og mong við mær spyrja tað sama.
Nevnda áseting í ”Sunhedsloven” kalla danir fyri ”samvitskuásetingin”.
Tað bæði undrar og harmar, at landsstýrismaðurin hevur valt ikki at hava nevndu áseting við í uppskotinum til føroysku lógina.
Tað, at hann(Bjarni K. Petersen) eftir øllum at døma ikki ynskir at heilsustarvsfólk skulu hava tað frælsið, sum danir, hóast alt, hava tikið hædd fyri í donsku lógini, er eftir mínum tykki einki minni enn ein ágangur móti heilsustarvsfólki. Móti teim, ”for hvem det strider mod deres etiske eller religiøse opfattelse at foretage eller medvirke til svangerskabsafbrydelse eller fosterreduktion”.
Ásetingin í grein 102 í donsku lógini forðar fyri at heilsustarvsfólk skulu kenna seg noydd at luttaka í fosturtøku inntrivi og gevur teim lógarásett frælsi til ikki at luttaka!
Hetta lógarásetta frælsi eigur sjálvandi eisini at fevna heilsustarvsfólk í føroyska sjúkrahúsverkinum.
Áhugavert kundi verið at hoyrt, hvat avvarðandi yrkisfeløg siga um, at ”samvitskuásetingin” ikki er við í uppskoti landsstýrsins.
Tordur J. Niclasen
sjúkrarøktarfrøðingur
Hetta er eitt lesarabræv. Meiningar og sjónarmið í lesarabrævinum eigur tann ið skrivað hevur. VP leggur nógv í talu- og skrivifrælsi. Tí eru allar meiningar vælkomnar, bara tær eru innanfyri karmarnar á revsilógini og fjølmiðlaetisku leiðreglunum. VP loyvir í ávísan mun dulnevndum lesarabrøvum, tá veit redaktiónin hvør hevur skrivað.
Um tú veitst okkurt, sum VP ikki veit - skriva so til vp@vp.fo
