Jenis av Rana, løgtingsmaður og formaður í Miðflokkinum, fyllir 70 ár í dag.
Hann varð borin í heim hin 7. januar 1953 í Trongisvági og er sonur Aslaug og Danjal.
Danjal av Rana, sáli, var borgarstjóri á Tvøroyri frá 1984 til 1992, umboðandi Javnaðarflokkin.
Jenis, sonurin, er best kendur sum politikari. Hann hevur sitið í løgtinginum fyri Miðflokkin síðan 1994 og hevur verið formaður í flokkinum síðani 2001.
Hann hevur eisini verið landsstýrismaður og var sum flestum kunnugt uttanríkis- og mentamálaráðharri í júst farna valskeiði, frá 2019 til 2022.
Jenis er útbúgvin lækni frá lærda háskúlanum í Aarhus. Hann tók prógv í 1983 og hevur starvast sum kommunulækni í Havn síðani 1995.
Í sínum yngru døgum var hann lærari á Tvøroyri og í Froðba. Hetta var í tíðarskeiðnum 1972-74.
Jenis er eisini kendur prædikumaður og var við til at seta á stovn kristiligu útvarpsstøðina Lindina, sum byrjaði at senda í ár 2000.
Hann er giftur við Onnu, og saman eiga tey tríggjar synir - Danjal, Hallur og Ari.
Um tú veitst okkurt, sum VP ikki veit - skriva so til vp@vp.fo
