Hvørt ár verður gjørt upp, hvussu tey ymsu flogfeløgini megna at halda seg innanfyri karmarnar tá tað ræður um trygdina.
Í ár liggur flogfelagið Cathay Pacific Airways úr Kina/Hong Kong ovast og Air New Zealand á øðrum plássi. Niðast liggur China Airlines og næstniðast Avianca Airlines við heimstaði í Kolumbia.
Sum skilst verður gjørd ein samlað meting, har bæði skaði á fólk og lutir verða tald við.
Talan er um ein fyribils lista, har bara toppur og botnur eru kunngjørd. Heilt smá flogfeløg sum Atlantic Airways eru ikki á listanum.
SAS sæst fyribils ikki á listanum, men í fjør lá skandinaviska flogfelagið nummar 47 á listanum har tilsaman 60 flogfeløg eru við. Til ber tó at siga, at SAS liggur onkunstaðni ímillum nummar 41 og 57 í ár.
Tað er týski felagsskapurin Jet Airliner Crash Data Evaluation Centre (JACDEC) sum ger listan á hvørjum ári.
Um tú veitst okkurt, sum VP ikki veit - skriva so til vp@vp.fo
