Tað blíðkar fyri hugaðum monnum, sigur orðatakið, og tað sama man vera galdandi fyri kvinnur. Eftir tógvi stríð í nógv ár og onkrar strævnar mótbrekkur, er føroyska 'brandið' av álvara farið at kasta av sær.
Í fjør lógu 1,1 mió kr eftir til eigararnar tá hvør hevði fingið sítt. Tað skal samanberast við vinning uppá 763 tkr í 2021 og 299 tkr í 2020.
Høvuðsvirksemið hjá Guðrun & Guðrun er sniðgeving av klæðum og handil.
Tað er ein vaksandi topplinja sum stendur fyri vøkstrinum. Bruttovinningurin var 4,7 mió kr í fjør sum skal samanberast við 3,9 mió kr árið fyri.
Eisini starvsfólkakostnaðirnir vaksa ár eftir ár, sum ber boð um at virksemið veksur. Í fjør rindaðu Guðrun & Guðrun soleiðis 3,1 mió kr í lønum, góðar 300 tkr meira enn árið fyri.
Fíggjarstøðan javnvigaði á nýggjárinum við 7,5 mió kr og eginognin var 2,5 mió kr.
Stjórar eru Guðrun Rógvadóttir og Guðrun Ludvig.
Um tú veitst okkurt, sum VP ikki veit - skriva so til vp@vp.fo
