Hóast nettosølan vaks úr 332 til 347 mió kr, so minkaði úrslitið hjá Vónini úr 41 mió í 2022 til 38 mió í fjør. Orsøkin er fyrst og fremst, at framleiðslukostnaðirnir vuksu, sæst í roknskapinum sum nú er almennur. Tað gav hóast alt framgongd í bruttovinninginum uppá smáar 4 mió kr, men starvsfólkakostnaðirnir vuksu við 7 mió kr og endaðu á 59 mió kr í fjør. Eisini útreiðslurnar til rentur vuksu eitt vet, og tí gjørdist úrslitið eitt vet verri í fjør enn fyrraárið.
Vónin hevur fleiri dóttirfeløg uttanlands, og úrslitið av kapitalpørtum var góðar 11 mió kr í fjør, eitt kvink betri enn árið fyri.
Vónin hevur íslendskar eigarar, og teir tóku 22,4 mió kr úr felagnum í fjør.
Fíggjarstøðan javnvigaði við 373 mió kr. Eginognin var 252 mió kr.
Hjalmar Petersen er stjóri.
Um tú veitst okkurt, sum VP ikki veit - skriva so til vp@vp.fo
