Hóskvøldið, í annaðkvøld, kl. 19.30 verður skipað fyri árligu vónargudstænastuni í Vesturkirkjuni, nú 4. árið á rað. Gudstænastan er ætlað at boða vón til øll, sum hava tungt at bera, og sum kenna sorg og sakn. Hvør situr við sínum.
Høvi verður at vera saman eina løtu um sang og tónleik. Birita Dam spælir bratsj, Eivin Dam Simonsen trompet og Hansus Joensen situr við urguna. Bíbliutekstir verða lisnir til troyst og ugga. Høvi verður at tendra ljós og at koma til altars.
Kirkjukaffi verður aftaná, og høvi verður tá eisini at fáa eitt prát við ein av prestunum.
Allir tríggir prestarnir, sum eru tengdir at Vesturkirkjuni, taka lut.
Øll eru hjartaliga vælkomin, siga prestarnir í Suðurstreymi í skrivi til miðlarnar.
Um tú veitst okkurt, sum VP ikki veit - skriva so til vp@vp.fo
