Fyri tíggju døgum upplivdi Kylian Mbappé at tapa eina HM-finalu upp á brotsspørk.
Í kvøld skeyt hann avgerandi brotssparkið seks minuttir inni í tíðini, sum dómarin hevði lagt afturat.
Mbappé setti bóltin ósvikaligt trygt í netið, og PSG vann harvið Ligue 1 uppgerðina móti Strasbourg 2-1.
Marquinhos hevði annars lagt PSG á odda 1-0 í fyrra hálvleiki, áðrenn hann sjálvur gjørdi sjálvmál í seinna hálvleiki.
Og í 62. minutti varð Neymar vístur av vøllinum, tá hann fekk sítt seinna gula kort í dystinum fyri at filma.
Men Parísianararnir fingu kortini tey trý stigini í hús, tá ið avtornaði, og hava nú 44 stig á 1. plássi, átta fleiri enn Lens á 2. plássi.
Heimsmeistarin Lionel Messi var ikki við í kvøld, tí hann hevur enn frí eftir finalusigurin í HM tann 18. desember.
Um tú veitst okkurt, sum VP ikki veit - skriva so til vp@vp.fo
