Bogaskjótisamband Føroya: Um vikuskiftið varð vetrarskráin í bogaskjóting skotin í gongd í skjótihøllini hjá bogaskjótifelagnum Ørvi. Eysturoyarfelagið hevur skjótihøll í kjallarahæddini í bygninginum hjá shippingfelagnum Navigare á havnarlagnum í Søldarfirði.

Lagt var fyri leygardagin við barna- og ungdómsskjótingini, sum verður skipað øðrvísið í vetur samanborið við undanfarin ár. Áður hava allir skjúttar undir 16 ár kunnað teknað seg til at skjóta í 12 metur frástøðu, og tey hava so øll kappast í einum og sama bólki. Tað er broytt, so at tað nú verður kappast í trimum aldursbólkum frá U18 og niðureftir: U18, U16 og U12. Hjá U18 er frástøðan 18 metrar, hjá U16 er hon 12 metrar, og hjá U12 er frástøðan 8 metrar.

Fyri at ongin skal noyðast at flyta í annan aldursbólk mitt í vetrarkappingini, hevur Bogaskjótisamband Føroya (BSKF) gjørt av, at skiftið millum aldursbólkarnar er 31. oktober, tó so at roknað verður fram til og við nýggjársaftan árið eftir.

Jónas og Narvi skutu úr 18 metrum
Dømi um, hvussu nýggja skipanin ávirkar býtið í aldursbólkar, var aktuelt longu í compoundkappingini hjá dreingjum í Søldarfirði leygardagin: Jónas B. Poulsen úr Ørvi er 14 ár, men 1. november fyllir hann 15. Tað merkir, at hann fyllir 16 næsta kalendaraár, og tí skal hann longu nú skjóta í U18, har skjótifrástøðan er 18 metrar. Kappingarneytin hjá honum, Narvi E. Jensen, sum eisini skjýtur við Ørvi, er bara 13 og fyllir 14 í mars. Tí kann hann kappast í U16, har tey skjóta í 12 metur frástøðu. Tað ber tó altíð til at tekna seg til kapping í einum eldri aldursbólki, enn ein av røttum hoyrir til í – bara ikki í einum yngri. Tað gjørdi Narvi, tí hann vildi hava kapping, og gjørdi hann ikki tað, hevði hann verið einsamallur í U16 og Jónas einsamallur í U18.

Í BSKF vóna tey, at skipanin við at skifta aldursbólk longu 31. oktober verður ein fyrimunur í sambandi við luttøku í útlendskum ungdómskappingum, har aldursbólkarnir altíð fylgja kalendaraárinum. Við serligu skipanini í heimligu kappingini, kunnu føroysku skjúttarnir nevniliga vera eitt sindur framman fyri í royndum í eitt nú U18 samanborið við kappingarneytarnar úr øðrum londum.

Samanborið við grannalondini eru eisini færri aldursbólkar í nýggju skipanini hjá BSKF við tað, at U14 og U21 ikki eru við.

Bara fimm skjúttar tilsamans luttóku í bogaskjótikappingini leygardagin, og tað er ov lítið til, at nøkur verulig eftirmeting av nýggju kappingarskipanini kann gerast enn, men í BSKF vóna tey kortini, at nýggja skipanin fer at roynast væl. Endamálið er, at fáa kappingarreglur og -standardir her heima at samsvara betur við altjóða reglur og standardir, at ongin skal noyðast altíð at kappast ímóti væl eldri og sterkari skjúttum, men at tað samstundis verður latið upp fyri betri møguleikum hjá teimum yngru bogaskjúttunum at menna seg og fyrireika seg betri til møguliga luttøku í útlendskum kappingum – her verður serliga hugsað um árligu kappingina um norðurlendska ungdómsmeistaraskapin í bogaskjóting, NUM.

Marta setti met
Hóast tað kanska ikki bleiv so nógv tilfar til hagfrøðiligar greiningar, so bleiv skjótingin í Søldarfirði leygardagin undirhaldandi, og tvey persónlig met blivu enntá sett.

Marta B. Poulsen úr Ørvi, sum áður hevur skotið bæði við recurveboga og berboga á 12 metrum, royndi seg hesa ferð við compoundboganum. Hon er bara 11, men fyllir 12 í februar, tá vetrarkappingin er reiðiliga hálvrunnin. Tískil er hon ov gomul til U12 og skal kappast í U16 í vetur. Hon hevði bara seg sjálva at kappast ímóti leygardagin, men ta avbjóðingina tók hon í so mikið stórum álvara, at hon í innleiðandi umfarinum við 446 stigum setti persónligt met við compoundboganum.

Brandur setti met
Eisini recurveskjúttin Brandur T. Hansen úr havnarfelagnum Tambar vísti, at hann hevur hildið støðið í summarsteðginum – og reiðiliga tað. Í innleiðandi kappingini fekk hann 502 stig, sum eisini er hansara persónliga met.

Mótstøðumaðurin hjá honum var tvífaldi FM-vinnarin í seinastu vetrarkapping Jón Sjúrður Jóhansson úr Vágaskoti.

Jón Sjúrður fekk 367 stig í innleiðandi kappingini leygardagin, og finaluna millum teir báðar vann Brandur sannførandi 6 – 0.

Jón Sjúrður er bara 9 ár, fyllir 10 í mars, og kundi tí skjóta í U12 í 8 metur frástøðu, um hann vildi. Men so hevði hann verið einsamallur í tí bólkinum, eins og Brandur, ið verður 13 í mars, hevði verið einsamallur í U16. Jón Sjúrður vildi heldur hava kapping, og skjeyt tí ímóti Brandi í U16.

Jónas vann hólmgonguna
Tað var bara í dystinum millum teir báðar compoundskjúttarnar, liðfelagarnar Jónas og Narva, at spenningur var um úrslitið, tí tað gekk rættiliga javnt á. Tó var sigurin hjá Jónasi ongantíð veruliga í vanda – hann vann innleiðandi kappingina við 524 stigum móti 512 til Narva og finaluna 135 – 127.

Stórur áhugi hjá teimum vaksnu
Var áhugin í lakara lagi hjá teimum ungu skjúttunum at taka lut í kappingini leygardagin, var hann hinvegin ovurstórur, tá tey vaksnu áttu tørn at skjóta úr 18 metrum sunnudagin.

So nógv høvdu teknað seg, at neyðugt varð at býta kappingina sundur, soleiðis at compoundkappingarnar vóru fyrrapartin, og berboga- og recurvekappingarnar seinnapartin.

Spennandi compound-finala
Fimm skjúttar høvdu teknað seg til compoundkappingina hjá monnum, men Sámuel T. Petersen noyddist at geva avboð vegna sjúku, so tað blivu teir fýra Jóannes Poulsen og Nikkel Petersen úr Ørvi, Bogi Andreasen úr Vágaskoti og Jógvan Niclasen úr Tambum, ið stillaðu seg á 18 metur-strikuna klokkan 10 fyrrapartin at skjóta innleiðandi kappingina.

Innleiðandi kappingin bar ikki beinleiðis boð um, at tað skuldi blíva so stórur spenningur í finaluni, sum tað bleiv. Jóannes byrjaði nøkulunda har, sum hann slepti seinasta vetur, og vann innleiðandi kappingina við 586 stigum framman fyri Nikkel, ið fekk 574 stig. Jógvan og Bogi vóru javnir við 565 stigum, men Jógvan hevði fleiri 10’arar og skuldi tí skjóta hálvfinaluna ímóti nummar tvey, Nikkel, og Bogi ímóti Jóannesi.

Gongdin í hálvfinalunum vísti tó, at finalan kundi blíva stak spennandi. Tí Jóannes og Nikkel vóru at kalla líka beinraknir – Jóannes vann 145 – 138 í sínari hálvfinalu ímóti Boga, og Nikkel vann 144 – 137 á Jógvani í hinari hálvfinaluni. Og í finaluni megnaði Jóannes akkurát at halda fast í evarska lítla muninum við úrslitinum 145 – 144. Bronsufinalan var eisini stak spennandi, og her vóru tvey stig á muni – Bogi vann 139 – 137 á Jógvani.

Rakul og Helena
Rakul Dam, Tambar, og Helena við Misá, Ørvur, vóru einsamallar í compoundkappingini hjá kvinnum seinasta vetur, og okkurt bendir á, at myndin verður tann sama í vetur.

Helena rakti best av teimum báðum í hesi yrstu hólmgonguni í vetrarkappingini. Hon vann innleiðandi kappingina við 487 stigum ímóti 479 til Rakul, og í finaluni gjørdi hon bart og vann 120 – 92.

Kvinnur við berboga
Tað er at fegnast um, at berbogin eisini var umboðaður í innandurakappingini í Søldarfirði. Hjá teimum vaksnu hevur tað næstan bara verið í kappingunum hjá Team SuðurSkot í Suðuroy, at kappast hevur verið við berboga (barebow), men sunnudagin dystaðust tær báðar Annika Næs Johannesen, Team SuðurSkot, og Barbara Krossteig, Tambar, í hesum bogaflokkinum.

Barbara Krossteig var greitt omaná sunnudagin, tá hon vann innleiðandi kappingina 333 – 298 og finaluna 6 – 0.

Jagoda í serflokki
Í recurve hjá kvinnum vísti fyrrverandi pólski úrvalsskjúttin Jagoda Wardak, Tambar, sína styrki, tá hon fyrst vann innleiðandi kappingina og síðan bæði hálvfinaluna og semifinaluna 6 – 0.

Kortini siga tey tølini ikki alt um styrkimunin, tí um hugt verður at einstøku umførunum í finaluni millum hana og Tóru Dinnu Reynskor úr Vágaskoti, so megnaði Tóra Dinna avgjørt at berjast ímóti. Tey trý umførini í finaluni endaðu 28 – 21, 28 – 26 og 27 – 22.

Tær báðar Ása Helena B. Rasmussen, Tambar, og Pernille Krogh, Vágaskot, høvdu tapt sínar hálvfinalur ímóti ávikavist Jagodu og Tóru Dinnu, og skutu síðan um bronsuna, sum Pernille vann við einum 6 – 0 sigri.

Viðvent í holuni
Hjá recurve-monnunum vóru tríggir skjúttar tilmeldaðir, og hóast lítil spenningur var um fyrstaplássið, sum Hans Petur Højgaard úr Ørvi vann trygt, so bleiv innanhýsis kappingin millum hinar báðar skjúttarnar endavend, um samanborið verður millum innleiðandi kappingina og hálvfinaluna.

Hans Petur vann innleiðandi kappingina við 554 stigum og beinleiðis pláss í finaluni, meðan Jógvan Magnus (Eggaba) Andreasen úr Vágaskoti og Michael Feldballe, Tambar, fingu ávikavist 530 og 457 stig. Kortini bleiv hálvfinalan teirra millum óføra spennandi. Teir skiftust um at vinna umførini til støðuna 4 – 4, og í seinsta umfarinum var Michael omaná, so hann vann 6 – 4. Gull til Hans Petur, silvur til Michael og bronsa til Eggaba.

Næsta grand prix-kappingin í bogaskjóting verður í Havn vikuskiftið 16. – 17. november.