Krígsbrotsmaðurin Putin hevur góðar dagar, hann sleppur at myrða, drepa og sorla Ukraina sundur og saman: sjúkrahús, íbúðahús, sethús, skúlar, skaðastovur, barnagarðar, vøggustovur, og børn í hópatalið verða dripin, og fólk í hópatali flýggja undan ræðuleikunum, uttan at almennu Føroyar á øllum økjum seta tiltøk í verk sum hava við Russland og russisk áhugamál at gera.
Hetta hendir eisini meðan Mariupol har suðuri í Ukraina - júst í hesum døgum verður bumbaður sundur og saman. Sorgarleikurin tekur ongan enda.
Hetta er í andsøgn við tey menniskjaligu og hjartanemandi hjálpartiltøkini sum Føroyingar annars í hesum døgum veita av hjálp til fólk úr Ukraina, og sum hava sýnt fólkinum í Ukraina samkenslu.
Bretar hava stongt sínar havnir fyri russiskum skipum, men almennu Føroyar lata ikki við seg koma.
Nærum øll lond í heiminum hava sett strong tiltøk í verk, so sleppur Putin og russar væl frá sínum sorli, oyðing og týning í Ukraina, og skip teirra sleppa at liggja trygg og fjálg í Føroyskum havnum.
Almennu Føroyar eiga at útihýsa alt sum hevur við russisk áhugamál at gera á øllum økjum.
Lasse Klein
Hetta er eitt lesarabræv. Meiningar og sjónarmið í lesarabrævinum eigur tann ið skrivað hevur. VP leggur nógv í talu- og skrivifrælsi. Tí eru allar meiningar vælkomnar, bara tær eru innanfyri karmarnar á revsilógini og fjølmiðlaetisku leiðreglunum. VP loyvir í ávísan mun dulnevndum lesarabrøvum, tá veit redaktiónin hvør hevur skrivað.
Um tú veitst okkurt, sum VP ikki veit - skriva so til vp@vp.fo
