Ein komandi borgmeistari má vera sjónligur í millumkommunalum felagsskapum so sum í kommunufelagnum og SEV. Tað verður nógv lagt á kommunurnar frá landinum og har eigur okkara rødd at verða hoyrd, og tað væl.

Kommunufelagið er hoyringspartur í nógvum av tí sum landi leggur út til kommunurnar at umsita og gjalda. Her eiga vit at hava okkara kritisku varnu rødd.

Eg havi verið inni á tí fyrr, hetta við deiling av partafelagsskatti, tøkugjaldi á alifiski og tilfeingisgjaldi á fiski. Ikki tí at eg haldi at hetta skal økjast, heldur hin vegin. Men tá hetta nú verður kravt, at kommunurnar fáa sín sjálvsagda part av hesum pengum og í røttum lutfallið.

Okkara firðir og sund eru tey ið leggja mest eftir seg í framleiddari nøgd av alifiski. Og tí eigur okkara kommuna at fáa stórsta partin av hesum gjøldum sum nátúrliga hoyra kommununi til. Eg ivist í hvat í núverandi formannsskapur í kommunufelagnum leggur í okkum. Trúgvi at hann er meir enn nøgdur við at har ið høvuðssæti hjá stórsta felagnum er, fellur stórsti bitin av køkuni, hóast nærum eingin aling er í tí kommununi.

Grøna orkuskiftið eigur eisini at koma til okkara í form av útbyggingum og vitanarstørvum. Tí eiga vit at gera okkum galdandi í t.d. SEV og fáa nakrar útbyggingingar norð í okkara øki eisini. Pláss er fyri fleiri vindmyllum eysturi á fjøllunum og tað er laga manni at útbyggja vatnorkuverki á Strond nú gomlu tunnlarnir eru tøkir til vatnleiðingar.

Okkara rødd má verða hoyrd og gera veruligan mun.

Tað er har eg eri!
Frímund Hansen