Fiskamarknaður Føroya: Tey størru ísfiskalínuskipini liggja við bryggju, men okkurt av teimum smærru eru farin til fiskarí. Tey fiska á Føroya Banka. Tvey frystilínuskip fiska undir Føroyum, eitt er vestanfyri Skotland og tvey sigla heim sum hava fiska tosk á Flemish Kap og kalva á Grandbank. Skipini undir Føroyum fáa mest av longu og brosmu, meðan tað vestanfyri Skotland fær mest av skøtu og brosmu.

Streymurin er harður, men batnar sum vikan gongur. Veðrið verður hampuligt, so roknað verður við nakað av útróðri. Fleiri fara væntandi út á Føroya Banka.

Ein ísfiskatrolari fiskar svartkalva. Hann er nýliga byrjaður túr, so tað er kanska ivasamt um hann landar í vikuni. Restin liggur við bryggju.

Trý pør fiska upsa og annan hvítfisk, serliga tosk og longu, og so eru tvey pør og ein við lemmum á gulllaksaveiðu. Fiskaríið eftir upsa er ójavnt.

Bara ein trolbátur er til fiskarí. Hann fiskar mest av hýsu og toski og so nakað av flatfiski. Hann landar síðst í vikuni. Væntandi fer onkur avstað í næstum.

Eitt garnaskip fiskar svartkalva. Fiskaríð er brúkiligt. Hini liggja við bryggju.