Mánaðarlønt kunnu síggja fram til eina lønarhækking á 0,45% í sambandi við "avtøkuna" av dýra biðidegi.
Tað stendur í lógaruppskotinum, sum stjórnin í Danmark hevur sent til hoyringar viðvíkjandi dýra biðidegi.
Ane Halsboe-Jørgensen, arbeiðsmálaráðharri, sigur í eini samrøðu við DR, at tað hevur verið umráðandi fyri stjórnina, at lønin verður ein partur av uppskotinum.
- Tað er serstakliga umráðandi fyri meg, at tá vit sum politikarar og stjórn ynskja at avtaka ein heiligdag, at vit sjálvandi sláa fast í sama viðfangi, at tað merkir, at fólk skulu hava løn fyri hendan arbeiðsdagin. Og tað tryggja vit við hesi lógini, sigur ráðharrin.
Verður lógaruppskotið samtykt í fólkatinginum, so verður dýri biðidagur ikki longur ein heiligdagur frá 2024 at rokna.
Dýri biðidagur hevur verið hildin líka síðan 1686.
Um tú veitst okkurt, sum VP ikki veit - skriva so til vp@vp.fo
