Flott av starvsfólkunum í Bústaðir, at tey fult og heilt bakka upp um ein av bestu stjórunum innan tað almenna, um ikki tann besta. 

Tey hava bara ongan møguleika ímóti Masterplaninum hjá einum vissum flokki í Løgtinginum við øllum valdinum, nevniliga at tryggja privatu vinum og stuðlum sínum at fáa meginpartin av fíggjarligu køkuni, sum Bústaðir fer at fáa heimild at taka lán og byggja fyri. Og júst tí fær Bústaðir ta heimildina, annars var hon ongantíð komin.

Nýggi leisturin er eitt beinleiðis álop á tey veikastu í samfelagnum, sum frameftir koma at gjalda í dýrum dómum í leigu fyri at tryggja politisku vinunum eitt tilpass stórt vinningsbýti at søta sína tilveru við. 

At almannamálaráðharrin onga viðmerking hevur til tað, sum fer fram millum nevnd og leiðslu í Bústaðir, er tí ógvuliga skiljandi, tí hvat skal tann stakkals málaráðharri siga og gera? 

Tær stóru avgerðirnar liggja sjálvandi langt frá hennara borði uppi í politisku skipanini, har hon onga atgongd hevur. 

So má ein spyrja seg sjálvan, hvar hinir báðir flokkarnir í samgonguni eru? Eru teir totalt paralyseraðir og settir út av spælinum, ella sita teir við bindi fyri eygunum og proppi í oyrunum?

Kári Mikkelsen