FSF: Hóskvøldið var lutakast um, hvussu spælast skal í fjórðingsfinalunum í steypakappingini hjá monnum. Dystirnir verða spældir mikudagin 8. og hósdagin 9. mai.

Tey sjey liðini, ið komu víðari úr 1. umfari, eru TB, Víkingur, HB, AB, B68, EB/Streymur og B36. Áttandi liðið í kappingini er NSÍ, sum eftir lutakast slapp beinleiðis víðari til fjórðingsfinalurnar.

Hesaferð var tað Jann Ingi Petersen, sum tók sær av lutakastinum, ið varð avgreitt á Svangaskarði á Toftum, har B68 fyrr á degnum spældi seg víðari í steypakappingini eftir ein tepran 1-0 sigur á ÍF.

Fjórðingsfinalur
Víkingur – AB (8. mai kl. 18:00)
TB – B68 (9. mai kl. 14:00)
B36 – NSÍ (9. mai kl. 15:00)
EB/Streymur – HB (9. mai kl. 16:00)

Sum lutakastið til fjórðingsfinalurnar háttaði seg, er neyðugt við broytingum í leikskránni í Betrideildini og í 1. deild hjá monnum.

Dystirnir í Betrideildini millum NSÍ og 07 Vestur, og Skála og HB er fluttir til mánadagin 13. mai, og meðan dysturin millum B68 og ÍF er fluttur til týsdagin 14. mai.

Í 1. deild er talan um dystirnar millum TB og HB, og AB og B71, ið skuldu vera leygardagin 11. mai. Hesir verða ístaðin spældir sunnudagin 12. mai.