Flogbóltssamband Føroya: SÍ – ÍF 3-2 (25-17, 22-25, 25-15, 21-25, 15-7)

Skalt tú hava spenning í Føroya Tele-deildini, so skalt tú hyggja tá SÍ spælir, tí fyri triðju ferð í ár gjørdist talan um 5-settara hjá SÍ, tá teir í kvøld tóku ímóti ÍF í Sørvági.

Eftir at SÍ hevði lagt seg á odda 2-1 í settum, sá út sum um at SÍ hevði hug at renna frá, tá teir fóru framum 18-15, eftir at liðini høvdu fylgst til 15-15. Men ÍF fekk teir aftur og fór eisini framum 23-20 og vann setti 25-21, og so skuldi alt avgerast við javnbrótara.

Við tveimum blokkum á rað frá Tóka í Haraldstovu legði SÍ seg á odda 5-0, og støðan gjørdist eisini 7-0 áðrenn ÍF kom á talvuna, men tá tóktist støðan hjá fuglfirðingum vónleys. Tá so ÍF vann okkurt stigið, fóru nógvar av servunum beint í netið ella út av vøllinum, og so hevði SÍ lætt spæl, og dystarbóltin vann SÍ við at ÍF sendi enn eina servu í netið til 15-7 til heimaliðið. 

Ávikavist 7 og 8 stig eru hjá SÍ og Mjølni upp til Fleyr á øðrumplássi, nú kappingin er hálvrunnin, so øgiliga nógv skal ganga teirra veg, skulu tey røkka finaluplássinum um føroyameistaraheitið, men tað er ikki ógjørligt, tí framvegis eru átta dystir eftir at leika – tvær ferðir ímóti hvørjum øðrum.