Bogaskjótisambandið: Føroyski landsliðsskjúttin Sámuel Petersen vann gull í U21-bólkinum í compound í norðurlendsku ungdómsmeistarakappingini í bogaskjóting um vikuskiftið. Í tí yngra endanum vóru føroysku skjúttarnir væl við og fingu av álvara blóð á tonna at royna aftur næsta ár.

Norðurlendska ungdómsmeistarakappingin, NUM, í bogaskjóting var í Larvik í Noregi um vikuskiftið, og har gjørdi føroyski landsliðsskjúttin Sámuel Petersen veruliga bart.

20 ára gamli compound-skjúttin vann gull í einstaklingakappingini í U21-bólkinum og silvur í liðkappingini.

Sámuel Petersen er fluttur til Íslands at búgva saman við íslendsku unnustu síni, og hann luttók á NUM fyri sítt íslendska felag. Tí var tað eisini saman við íslendskum liðfeløgum, at hann vann silvur í liðkappingini. Unnustan Anna María Alfreðsdóttir er eisini bogaskjútti, og hon var við á einum øðrum íslendskum U21-liði, sum vann bronsu í compound.

Teir fýra ungu recurve-skjúttarnir frá Vágaskoti Lea Karina Heradóttir Haraldsen, 13 ár, Hannis Reinert á Plógv, 14 ár, Vanja Djurhuus, 14 ár, og Marianna Reynskor, 15 ár, tóku eisini lut í NUM, og hóast tað ikki rakk til heiðursmerkjakappingarnar, vóru tey væl við.

Genturnar vunnu seg allar í 1/16-finalurnar í einstaklingakappingunum og Hannis í 1/8-finalurnar.

Í liðkappingini vóru Lea Karina, Hannis og Marianna á sama liði, sum mátti lúta fyri einum donskum liði í 1/8-finaluni. Vanja var á einum blandaðum norðurlendskum liði, sum eisini tapti fyri einum donskum liði í 1/8-finaluni.

Grundarlagið fyri at mennast sum skjúttar er gott hjá ungu skjúttunum. Tey fýra vóru eisini ógvuliga fegin um túrin og hava øll fingið blóð á tonna at royna seg aftur á NUM næsta ár.

Góða úrslitið hjá Sámuel ber boð um, at hann hevur ment seg nógv sum bogaskjútti hetta seinasta árið. Hann var nevniliga eisini við á NUM í Kemi í Finnlandi í fjør summar, og tá bleiv hann nummar fýra í einstaklingakappingini í compound í bólkinum 18-20 ár og vann bronsu í liðkappingini á einum blandaðum norðurlendskum liði.

At formurin hjá Sámuel er so góður, ger tað ikki minni hugaligt hjá føroyska landsliðnum í bogaskjóting, sum seinni í vikuni fer til Guernsey at kappast á Oyggjaleikunum har.