Sáttmálarnir millum Føroya Reiðarafelag og tey trý manningarfeløgini fóru úr gildi 1. apríl. Samráðingarnar millum Reiðarafelagið og Fiskimannafelagið eru framvegis í gongd, meðan Semingsstovnurin hevur skipað samráðingarnar millum Reiðarafelagið og Maskinmeistarafelagið og Føroya Skipara- og Navigatørfelag.
Reiðarafelagið hevur verið til seming við Maskinmeistarafelagið og Føroya Skipara- og Navigatørfelag seinastu dagarnar, har Semingsstovnurin hevur roynt at funnið semju. Hetta er tíverri ikki eydnast.
Allir tríggir partarnir hava havt krøv um broytingar í eykapørtum, men hesi krøv stríða ímóti hvørjum øðrum. Semingsstovnurin heitti tí á partarnar um at sleppa hesum krøvum fyri at koma víðari í samráðingunum.
Føroya Reiðarafelag og Maskinmeistarafelagið vóru til reiðar at sleppa hesum krøvum við tí fortreyt, at allir partar tóku undir við tí. Føroya Skipara- og Navigatørfelag vildi ikki ganga hesi áheitan á møti. Tí valdi Semingsstovnurin at gevast við semingsroyndini í gjár.
Eftir at Semingsstovnurin legði frá sær, hevur samskifti verið millum Reiðarafelagið og Maskinmeistarafelagið, og partarnir hava avtalað at leingja sáttmálan til og við 22. apríl 2022 á midnátt. Sáttmálin við Fiskimannafelagið er eisini longdur, og samráðingar verða eftir ætlan tiknar uppaftur í morgin, týsdagin.
Føroya Reiðarafelag
Stefan í Skorini, stjóri
Hetta er eitt lesarabræv. Meiningar og sjónarmið í lesarabrævinum eigur tann ið skrivað hevur. VP leggur nógv í talu- og skrivifrælsi. Tí eru allar meiningar vælkomnar, bara tær eru innanfyri karmarnar á revsilógini og fjølmiðlaetisku leiðreglunum. VP loyvir í ávísan mun dulnevndum lesarabrøvum, tá veit redaktiónin hvør hevur skrivað.
Um tú veitst okkurt, sum VP ikki veit - skriva so til vp@vp.fo
