Eitt innslag í útvarpstíðindunum í kvøld fær tað at ljóða sum um, at játtanin hjá Fróðskaparsetrinum verður skerd munandi til komandi ár.
Veruleikin er, at fíggjarlógaruppskotið legði upp til, at 10 milliónir krónur skuldu játtast afturat til Fróðskaparsetrið í 2024 samanborið við 2023.
Út frá upplýsingum um minkandi tal av lesandi eru samgonguumboðini í fíggjarnevndini komin til, at tað er ráðiligt at lækka játtanina við 500.000 krónum samanborið fíggjarlógaruppskotið (andstøðuumboðini meta 750.000 krónur vera ráðiligt).
Sostatt verður rakstrarjáttanin hækkað 9,5 milliónir krónur í 2024.
Vónandi hevur tað ikki við sær, at fleiri fara av landinum at lesa, ella at hesar 500.000 krónurnar fara at koppa allari fíggjarætlanini hjá Fróðskaparsetrinum, har rakstrarjáttanin er meira enn 150 milliónir krónur.
Eirikur í Jákupsstovu
Fíggjarnevndarlimur fyri Tjóðveldi
Um tú veitst okkurt, sum VP ikki veit - skriva so til vp@vp.fo
