Nú kunnu tey, sum sita við fiskiloyvum fyri nógvar milliardir, gníggja sær í hendurnar, tí nú fáa tey ognarrættin til fiskiloyvini til allar tíðir, sum tey kunnu skalta og valta við, sum teimum lystir og selja fyri stórar upphæddir, um tey vilja tað.

Hetta er ein avleiðing av ætlanini hjá Dennis Holm at seta í verk eina rullandi skipan við fiskiloyvum, sum verða galdandi í 10 ár, men sum hvørt ár verða framlongd næstu 10 árini. Hetta er tað sama sum, at loyvini verða latin í óendaligheit! Breið politisk semja tykist verða fyri ætlanini, og tað er júst tað, sum ger, at loyvini verða avreidd til privat med alla.

Borgarliga andstøðan tekur sjálvsagt undir við ætlanini hjá landsstýrismanninum, nú privati ognarrætturin til fiskiloyvini verður knæsettur, og tá breið politisk semja tykist verða í løgtinginum, verða ongar broytingar gjørdar nakrantíð, óansæð hvør samgonga situr við valdinum. Vanliga plagar ein breið politisk semja at verða fatað sum nakað positivt, men júst í hesum førinum er støðan tann øvuta!

Fiskiloyvini kunnu sjálvsagt framvegis sigast upp við 10 ára freist, men tað fer ongantíð at henda, tí ongin flokkur fer at ganga ímóti tí, sum hann frammanundan hevur verið við til at samtykkja!

Eg haldi, tað er ófatiligt, at politiska skipanin tykist samd um, at lata virði hjá landinum fyri nógvar milliardir til nakrar privatar borgarar med alla fyri onki. Hetta hendir samstundis, sum alsamt fleiri føroyingar mugu søkja sær hjálp frá privatum felagsskapum til mat og klæði.

Hvør skuldi trúð, at tað er ein landstýrismaður fyri tjóðveldisflokkin, sum er upphav til hesa ætlan?

Jákup Andreasen