Tað er vorið sera trupult at finna eitt parkeringspláss, tá tú ferðast við bili í Miðbýnum í Havn í dag.

Ferðslan er nógv økt bara síðstu fáu árini, og sýnist hon at fara at vaksa enn meir komandi árini, og harvið koma parkeringstrupuleikarnir helst at versna munandi, um onki munagott verður gjørt.

Hetta skapar misnøgd og mistrivnað fyri okkara borgarar í Tórshavnar kommunu og ikki minst eisini fyri okkara handilsvinnu í Miðbýnum, sum missir inntøkur, um teirra kundar ikki fáa parkeringspláss nærhendis.

Fleiri valdir býráðslimir, bæði í meirlutanum og minnilutanum, høvdu nettupp parkeringsviðurskiftini ovast á breddanum í valstríðnum til býráðsvalið.

Tí vænti eg sjálvsagt, at allir býráðslimir taka undir við mínum uppskoti um at seta pening av til fyriteiking og projektering av parkeringshúsi á Skálatrøð.

Heðin Mortensen, borgarstjóri, hevur alment boðað frá, at hann ikki tekur undir við einum parkerinstunnli, sum undanfarni býráðsmeiriluti annars arbeiddi fyri. Tí skuldi verið lagamanni, at borgarstjórin nú meldaði út, at hann og meirilutin vildu samtykkja at byggja parkeringshús á Skálatrøð.

Eitt komandi parkeringshús á Skálatrøð skal sjálvsagt fyrireikast væl, so at tað arkitektoniskt fellur væl inn í umhvørvið á staðnum. Uppskot fyriliggja í dag um hetta, so nattúrligt er at arbeiða víðari við hesum.

Borgarar í Tórshavnar kommunu kunnu heilt einfalt ikki bíða longur.

Parkeringstrupuleikarnir mugu loysast nú!

Nú má handling setast í staðin fyri føgur orð og gylt vallyftir.

Birgir Nielsen
Býráðslimur fyri Fólkaflokkin