Orð: Marjun Lómaklett: Fyrsti sunnudagur í advent 2023 var sera stórur dagur fyri kirkjuliðið í Árnafjarðar kirkju, av tí at nýggjur altardúkur varð vígdur og tikin í nýtslu.

Nýggi altardúkurin, sum bleiv vígdur og tikin í nýtslu, varð byrjaður fyri meira enn 10 árum síðani, Thurid Christiansen, sum var ættað úr Árnafirði, men búði í Sandavági, vildi fegin gera - og geva kirkjuni altardúkin, men so gjørdist Thurid tíverri sjúk, og tessvegna helt Sofía Jacobsen í Sandavági áfram at brodera altardúkin, og nú hevur Paulina M. K. Eliasen á Syðradali gjørt hann lidnan.

Altardúkurin er gáva til kirkjuna.

Hesin altardúkurin er broderaður við hardangerseyming. Myndevnini eru krossur og bikar. Hetta mynstrið er mest nýtta til altardúkar í Føroyum, tí sambart skrásetingunum úr bókini Kirkjuklæði, sum kom út í 2020, vóru tá 24 tílíkir dúkar. Tó er ymiskt, hvussu hornini eru broderað í sambandi við longd av altarinum.

Elsti altardúkurin, ið er broderaður við hesum mynstrinum, er frá um leið 1900 og var í gomlu kirkjuni í Klaksvík.

Kirkjuklokkurnar kallaðu saman til gudstænastu kl. 11.00, og 34 fólk høvdu leitað sær í kirkjuna henda avbera vakra, kalda og glerstoytta sunnumorgun.

Marjun Lómaklett, prestur, vígdi nýggja altardúkin, deknur var Charlotta Thorsteinsson, klokkari var Niels Andreasen og urguleikari var Kristoffur Olsen.

Thurid Christiansen, sum eisini hevur verið deknur í Árnafjarðar kirkju andaðist hin 11. septembur 2022. Tessvegna var hetta sera stórur dagur fyri mann hennara Hergeir Christiansen, børnini, abba- og langaabbabørnini, at altardúkurin kundi latast Árnafjarðar kirkju, vígast og takast í nýtslu 1. sunnudag í advent 2023.