Firum: Sandra Ljósá Østerø, Jessica Di Toro, Eydna í Homrum, Esbern Patursson og Kirstin Eliasen hava givið út vísindaliga grein í “Open access” tíðarritinum PLOS ONE.

Greinin ber heitið “Using a length-weight relationship based on wild lumpfish (Cyclopterus lumpus L.) for estimation of body condition of lumpfish in salmon cages”. Greinin viðger, hvussu mann betur kann meta um likamligu støðuna hjá rognkelsum.

Rognkelsi verða nýtt sum lúsatálmarar í alivinnuni. Umráðandi er at hava góðar og rættar mátar, tá ið vit skulu meta um vælferðarstøðuna hjá rognkelsunum, so setast kann inn á røttum staði, tá ið neyðugt er.

Tá ið metast skal um vælferðarstøðuna hjá rognkelsum í aliringum, verða nógvir ymiskir vælferðarávísarar, vælferðarindikatorar, nýttir. Tað kann vera likamlig støða, standurin á fjaðrunum, eygunum og skræðuni. Saman geva hesir vælferðarávísarar eina samlaða mynd av vælferðarstøðuni hjá rognkelsum. Likamliga støðan, body condition, ið kann samanberast við BMI hjá fólki, er sostatt ein av mongum vælferðarávísarum, ið verða nýttir.

Í greinini vísa høvundarnir á, at við at nýta vill rognkelsi sum standard/ideal, so kann mann fáa eina betri meting av, hvussu rognkelsini í aliringum eru fyri likamliga, enn man fær við teimum mátunum, sum man hevur brúkt frammanundan. Hetta ger, at fleiri ov løtt og rak rognkelsi enn áður verða uppdagaði. Vónandi kann hetta  verða ein liður í at betra um vælferðina hjá rognkelsum í aliringum.

Greinin er gjørd í samstarvi við Hiddenfjord, Mowi og Havstovuna, ið m.a. savna inn dátur um vill rognkelsir kring Føroyar á teirra rannsóknartúrum.

Sandra Ljósá Østerø er høvuðshøvundur. Viðhøvundar eru Jessica Di Toro, Eydna í Homrum, Esbern Patursson og Kirstin Eliasen.

Les alla greinina her