Trojanski hesturin er kendur frá Iliaduni, sum sigur frá krígnum millum Grikkar og Trojabúgvar. Hetta kríggið leikaði á einaferð umleið ár 1200 fyri Kristus.

Í 10 ár høvdu Grikkar og Trojanar barst, tó úrslitaleyst. Tá fær kongurin í Ithaka tað listinlærda hugskotið, at byggja ein risastóran "innantóman" træhest. Og inni í hesum krógvar hann seg, saman við útvaldum hermonnum. Restin av herinum letst ríma, tó krógva nakrir seg tætt við býin, meðan aðrir rógva skip grikka burtur frá Troja.

Íbúgvar Troja fegnast, teir halda, at grikkar eru rýmdir og flyta stórsligna hestin inn í Troja. Og har verður stór veitsla hildin til langt út á náttina.

Seint á nátt, tá flestu menn eru druknir og viknaðir, krúpa Grikkar út úr hestinum og lata upp portur býarinnar fyri restini av hermonnunum. Tá varð lætt hjá edrúum grikkum at sigra á druknu fíggindum sínum- og yvirtaka Troja.

Skaðilig tiltøk av flatlondum
Norðurlandahúsið, sum í ár fyllir 40, hevur ríkað land okkara á nógvum økjum. Men á øðrum, og sera týdningarmiklum økjum, kann Norðurlandahúsið sammetast við hestin í Troja, tí langt frá alt er gott og gagnligt, sum borðreitt verður við har.

At skipa fyri og lata dyrnar upp fyri oyðileggjandi tiltøkum av flatlondum, er vorðið eitt afturvendandi átak í húsinum. Og í hesum døgum verður átak, líkt tí í Troja, hýst í NLH.

Endamálið er eittans, at ávirka Føroyar og føroyingar við óføroyskum, óbíbilskum og skaðiligum kynsligum hugsanum, sum annars liggja fjart frá tí, sum føroyingar ”ervdu fedrum av”. Átøkum, hvørs snilda endamál er at seta spurningin- ”hevur nú Gud sagt”.

Og málbólkurin, sum lagt verður eftir, er børnini. Við tølandi orðum og myndum verða lærarar og foreldur lokkaði at senda børn síni í NLH til leikir og tiltøk, hvørs einasta endamál er at ávirka komandi ættarlið at skifta ”hitt náttúrliga um við tað, ið er ímóti náttúruni”.

Í stýrinum fyri NLH eru tveir av sjey limum útlendingar- og væl meira enn 80 % av fíggingini er útlendsk- úr Norðurlandaráðnum. Tí eru allar royndir at muta ímóti til fánýtis.

Talan er um útlendskkt vald, og fremmanda ávirkan, sum snildisliga verður smoygd yvir okkum.

Umráðandi at foreldur og lærarar eru á varðhaldi!
Í Troja hevði støðan verið ein onnur, um íbúgvarnir vóru vaknir og á varðhaldi.

Sama er hjá okkum.

Um ikki lærarar, foreldur og allar góðar kreftir taka saman hendur, rópa varskó og bera boðini um, at hesturin er alt annað enn ”tómur” og vandaleysur, so farast virðini- sum Troja á sinni!

So áheitan Miðfloksins á føroysk foreldur er: verjið børn tykkara, verið á varðhaldi fyri tí, sum snildisliga verður roynt at ávirka virðismiklastu ogn tykkara, børnini, við.

Altvgerandi er eisini, at vit sum tjóð sum skjótast taka NLH yvir á føroyskar hendir! Jú, tað kostar, men virði barnanna kann ikki metast í krónum og oyrum.

Vegna Miðflokkin
Steffan Klein Poulsen, løgtingslimur
Jenis av Rana, løgtingslimur