Kóboykex: Nýggi føroyski bólkurin Kóboykex, ið er mannaður við Sigmundi Zachariassen og Heiðriki á Heygum, gevur í dag út sítt nýggja staklag, ið kallast “Night Out”.

Kóboykex hevur verið nógv um seg seinastu tíðina, har bólkurin hevur spælt á fleiri festivalum. Eitt nú á The Great Escape í Onglandi og her í Føroyum á Country Festivalinum og G! Festivalinum.

Næsta vikuskifti eru teir ein av teimum útvaldu bólkunum, ið skulu spæla á Iceland Airwaves saman við nøvnum sum Brimheim, Janus Rasmussen, Guðrið Hansdóttir og Marius DC.

Sigmundur er vanliga kendur frá bólki sínum Joe & the Shitboys, ið vann besti bólkur til FMA 2019, og hann er við at byggja sær stórt navn upp á útlendska punk pallinum. Fjøllistamaðurin Heiðrik kenna vit frá plátum hansara Funeral og Illusions, har landaplágur sum “Change of Frame”, “Monster” og “Hope You’re Crying” eru á. 

Sigmundur og Heiðrikur siga, teir fáa íblástur frá tónleikinum hjá Beck, Ennio Morricone, Patsy Cline, The White Stripes, Mirwais og gomlum spaghetti western filmum.

Gwenaël Akira Helmsdal Carré hevur upptikið.