Eini 700 gingu ella runnu Tórshavn Marathon í dag.

Her eru fleiri myndir

Myndir: Ólavur Frederiksen

Omanfyri 700 fólk runnu Tórshavn Marathon í gjár.

Heðin Mortensen, borgarstjóri í Tórshavnar kommunu, setti Tórshavn Marathon í gongd, tá fleiri hundrað fólk fóru úr Vágsbotni.

Tey, ið gingu hálv maraton byrjaðu í Kaldbak.

Her er brot úr røðuni hjá Heðini Mortensen, borgarstjóra í Tórshavnar kommunu:

"Vit hava bæði sunn og vøkur maraton í Føroyum, millum hesi er Tórshavn Marathon.

Teinurin er vakur, - tit fara gjøgnum fleiri av bygdunum í Tórshavnar kommunu.

Fólk, ið ganga hálvmaraton, fara fyri fyrstu ferð at byrja í náttúruvøkru og friðsælu bygdini Kaldbak, og síðani at ganga til Havnar, til komið er á mál í Vágsbotni. Sostatt ber til at røkja sál og sinn á hesum sunna og vakra túri.

Rennararnir byrja her í Vágsbotni. Og eg skilji á lagnum, at teinurin á Tórshavn Marathon er millum mest avbjóðandi í Norðanlondum.

Tit renna á sløttum, tit renna í brekkum, tit renna í bygdum, tit renna í óbygdum. So tit sleppa veruliga at royna føroyska lendið.

Men tit vita, at Havnin er málið, og tá loysir tað seg at halda á til málið er rokkið.

Hásummartíð er í Føroyum, og tí er Tórshavn Marathon kanska eisini vakrasti teinur í heiminum.

Náttúran er í fullum blóma. Tit síggja spælandi smálomb, fuglar, ið verja reiður, - bø og blómur í alskyns litum.

Um tit eru heppin síggja tit kanska hval á Kaldbaksfirði, men tað tori eg kortini ikki at lova tykkum.

Upprunaligi teinurin í Grikkalandi var 40 kilometrar. Men eg læs herfyri, at tað í ár eru júst hundrað ár síðani, at maraton teinurin gjørdist teir góðu 42 kilometrarnir, hann er í dag.

At renna so langt krevur treysti, og renna allan teinin er eitt bragd. Tað krevur veiggj og vilja.

Tit eru nógv, ið hava hesar eginleikar, og um hálvan triða til tríggjar tímar koma fyrstu tykkara, sum renna allan maraton-teinin,  á mál her í Vágsbotni.

Onnur hava kanska sett sær persónlig mál um hálvt maraton ella at ganga teinin innan ávísa tíð.

Og tað, í sjálvum sær, at røkka málum, ið vit seta okkum, krevur áhaldni."