Í dag verða málningar hjá Torbjørn Olsen vístir fram á Ráðhúsinum í Reykjavík. Framsýningin er komin í lag í sambandi við Mentanarnáttina í Reykjavík.
Vanligt er, at føroysk tiltøk eru í sambandi við Mentanarnáttina, t.d. er á hvørjum ári tiltak á føroysku sendistovuni við tónleiki, málningaframsýning, føroyskum mati v.m. Tað er sum partur av hesum, at framsýningin á Ráðhúsinum er komin í lag og eru tað Sendistova Føroya og Listagluggin, ið hava fyriskipað framsýningina.
Á framsýningini eru 20 málningar, sum eru serliga málaðir til høvið. Myndevnini eru úr ymiskum støðum í Tórshavn, gentu- og kvinnumyndir, sjálvsmynd og ein málningur, sum ímyndar niðurtøkuna av krossinum.
Tað var Annika Olsen, borgarstjóri, ið setti framsýningina. Listamaðurin, Torbjørn Olsen var eisini til staðar og Stanley Samuelsen sang nøkur løg.
Framsýningin verður opin til sunnudagin, 27. august.
Um tú veitst okkurt, sum VP ikki veit - skriva so til vp@vp.fo
