Vinnuhúsið: Fríggjadagin 1. mars skipaði Havbúnaðarfelagið fyri árligu Aliráðstevnuni. Upp ímóti 450 luttakarar luttóku á ráðstevnuni í ár, og ongantíð áður hevur luttakaratalið verið so stórt sum hesuferð.

Høgni Hoydal, landsstýrismaður í umhvørvis- og vinnumálum setti Aliráðstevnuna, har fólk úr alivinnnuni, granskingarstovnum, undirveitarum til alivinnuna og frá almennum myndugleikum luttóku.

Á skránni vóru bæði styttri og longri framløgur um gongdina í føroysku alivinnuni, og aðrar framløgur sum viðgjørdu ymisk áhugaverd og aktuel evnir í alivinnuni í løtuni.

Eisini vóru framløgur um ymiskar avbjóðingar sum alivinnan hevur.

Á Aliráðstevnuni eru eisini góðir møguleikar at netverka, og nógv nýttu møguleikan at fáa eitt prát við fólk í og kring alivinnuna.

Framløgurnar frá degnum verða lagdar út á heimasíðuna hjá Vinnuhúsinum.

Aliráðstevnan er árligt afturvendandi tiltak, sum Havbúnaðarfelagið skipar fyri, og komandi ár verður Aliráðstevnan eftir ætlan hildin fríggjadagin 7. mars 2025.