Lærarafelagið mótmælir harðliga, at Mentamálaráðið gevur einum av limum okkara boð um ikki at úttala seg alment um skúlabygnaðin í hansara egna skúla. Á henda hátt setir Mentamálaráðið hansara grundlógartryggjaðu rættindi at úttala seg grovliga til viks. Skúlastjórin vísir á, at tíðarætlanin fyri bygnaðarbroytingunum í Sankta Frans skúla er so knøpp, at tað er neyðugt at avgerðin verður tikin beinanvegin. Hann er í sínum fulla rætti at umtala og kunna almenningin um hesi viðurskiftini, sum snúgva seg um hansara egna heimildarøki.

Mentamálaráðið átti sum umsitari av fjølmiðlaøkinum verið tann fyrsti myndugleikin, sum av øllum alvi royndi at verja rættin hjá starvsfólki at úttala seg. Signalvirðið í avgerðini hjá Mentamálaráðnum um at geva skúlastjóranum munnkurv er, at alment starvsfólk ikki skulu úttala seg um egin viðurskifti. Hetta er beinleiðis í andsøgn við demokratiska tíðarandan og førda politikkin í landinum. Lærarafelagið mótmælir við hesum harðliga avgerðini og heitir á landsstýriskvinnunnuna um at kanna málið innahýsis í Mentamálaráðnum og seta forboðið úr gildi.  

v/Lærarafelagið
Herálvur Jacobsen, formaður