Lummaur úr gulli sum ríkasti maður umborð á Titanic átti er selt á uppboði fyri 7,8 milliónir krónur
Søgan um 47 ára gamla John Jacob Astor er ein av fleiri hugtakandi hendingum sum fóru fram løtuna áðrenn Titanic sakk 14. apríl 1912. Hann syrgdi fyri, at konan, sum var við barn, kom við einum av bjargingarbátunum. Sjálvur visti hann, at seinasta løtan var komin, so hann roykti sína seinastu sigarett, áðrenn hann endaði í ísakalda sjónum, har hann doyði í kulda saman við nógvum øðrum. Tá líkið seinni varð bjargað, funnu tey urið, sum nú er selt á uppboði, í lummanum.
Umframt urið vóru eisini fleiri aðrir lutir seldir á uppboðssøluni. Eitt nú violinhúsin sum orkesturleiðarin umborð, Wallace Hartley, átti. Hann hevði surrað taskuna fasta um kroppin, kanska fyri at fáa betri flot, men hann varð eisini funnin deyður nakrar dagar eftir at Titanic sakk, skrivar BBC.
Um tú veitst okkurt, sum VP ikki veit - skriva so til vp@vp.fo
