Í KVF kl. 18 í gjár slapp løgtingsformaðurin at staðfesta, at drúgva frágreiðingin í 2010 við heitinum “Frágreiðing um avgerðir at løggilda grannskoðarar” snúði seg um sjálvar løggildingarnar.

Men hetta er skeivt.

Í skrivi til advokatin hjá grannskoðarunum skrivar løgtingsins umboðsmaður beinleiðis: “Endamálið við kanningini hjá mær er at lýsa og viðgera viðgerðina og avgerðirnar hjá myndugleikunum í hesum málum. Klientar tygara eru ikki at meta sum partar í málinum, tó at teir, sum tygum nevna, eru tilnevndir løggildir grannskoðarar í 2007”.

Grannskoðararnir vórðu tí ikki hoyrdir í málinum.

Tað var sostatt ikki sjálvar løggildingarnar umboðsmaðurin fór eftir, men almennu handfaringina av málinum í aðalráðum vm.

Men málið fekk ongar avleiðingar fyri almennu fyrisitingina, hóast tað var fyrisitingin og ikki grannskoðararnir, ið umboðsmaðurin fanst at.

Hinvegin fekk tað avleiðingar fyri nakrar grannskoðarar, sum sambært umboðsmanninum ikki vóru partar av málinum. 

Málið fekk sostatt eina heilt aðra gongd enn tað, sum umboðsmaðurin vildi. Hetta sigur kanska eitt sindur um løgfrøðiligu dømikraftina.

Hvussu Páll á Reynatúgvu fær vent hesum til ein sigur fyri umboðsmannin, er ikki lætt at skilja.

Sí skriv frá Umboðsmanninum