![Elsa b](https://www.vp.fo/fileadmin/_processed_/2/b/csm_elsa_b_13a94f08c2.jpeg)
![Elsa b](https://www.vp.fo/fileadmin/_processed_/2/b/csm_elsa_b_13a94f08c2.jpeg)
Eg stilli upp til umboðsráðsvalið hjá LÍV, tí eg meini, at LÍV eigur og kann vísa enn størri samfelagsatlit og taka ein aktivari lut í grøna orkuskiftinum.
Veðurlagskreppan hoyrir ikki bert framtíðini til, vit liva í henni. Hvør heimspartur merkir longu ógvusligu avleiðingarnar av veðurlagsbroytingum, og í fleiri førum hevur Global Risk Report listað vantandi veðurlagsátøk millum 5 tær størstu hóttanirnar ímóti samfelagsstabiliteti.
Vit hava tørv á, at øll taka lut í grøna orkuskiftinum, eisini tryggingar- og pensjónsfeløg. Tað er av størsta týdningi, at íløgur tey komandi árini eru við til at tryggja okkum eina grøna, rættvísa og liviliga framtíð heldur enn at fasthalda okkum í eini skipan, sum er tongd at kolvetni. Ein tann størsta avgerð LÍV kann taka nú er tí at taka allan pening úr olju-, kol og gassvinnuni.
LÍV hevur í nýggjari tíð gjørt íløgur í framleiðslu av varandi orku og er hugað at luttaka í bústaðarverkætlanum og hevur við hesum víst samfelagsatlit. Hetta er gott. LÍV kann gera so nógv annað aftrat fyri at vísa veruligt samfelagsatlit, og sum ein enn aktivari viðspælari í grøna orkuskiftinum, eigur LÍV at
- selja síni partabrøv í kolvetnisvinnuni
- gera tað gjørligt hjá sínum viðskiftafólkum at velja íløgur í kolvetni frá
- seta átøk í verk fyri at minka CO2 útlátið niður í 0 í 2030
- gerast partur av loysnini og ikki trupulleikanum
Allir kundar í LÍV kunnu atkvøða til og við tann 30. januar. Verði eg vald, fer peningurin, ið sessurin gevur, til Veðurlagslóg Nú!
Elsa Berg
Hetta er eitt lesarabræv. Meiningar og sjónarmið í lesarabrævinum eigur tann ið skrivað hevur. VP leggur nógv í talu- og skrivifrælsi. Tí eru allar meiningar vælkomnar, bara tær eru innanfyri karmarnar á revsilógini og fjølmiðlaetisku leiðreglunum. VP loyvir í ávísan mun dulnevndum lesarabrøvum, tá veit redaktiónin hvør hevur skrivað.
Um tú veitst okkurt, sum VP ikki veit - skriva so til vp@vp.fo