Heilsustýrið: Týsdagin 18. juni skipar Heilsustýrið fyri kunnandi tiltaki um arbeiðið hjá deildini fyri Genomisk Medicin á Ríkissjúkrahúsinum og um FarGen. Heilsustýrið og Genomisk Medicin skrivaðu fyrr í ár undir samstarvsavtalu, sum eitt nú inniber at menna leistir fyri persónlagað medisin í Føroyum. Genomisk Medicin stendur eisini fyri at gera genomkanningar fyri Sjúkrahúsverk Føroya.

Í sambandi við at umboð fyri Genomisk Medicin í hesum døgum vitja í Føroyum, verður skipað fyri kunnandi tiltaki í veitsluhøllini á Landssjúkrahúsinum 18. juni kl. 14.30-16.00.

Á skránni verða framløgur um:

• FarGen og samstarvið við Genomisk Medicin

• Next generation sequencing

• Frá blóðroynd til genetiska frágreiðing

• Avleiðingar av genetiskari útgreining

• Samtykki

• Kliniskt dømi um persónlagað medisin

• HBOC-verkætlanin

Tiltakið er alment, og øll eru hjartaliga vælkomin.

Deildin fyri Genomisk Medicin er staðsett á Ríkissjúkrahúsinum, og stórur dentur verður lagdur á samstarvið við klinisku deildirnar fyri at stuðla undir verksetingina av persónlagaðum medisini. Grundfestið í persónlagaðum medisini er, at ílegusamansetingin hjá einstaklinginum hevur týdning fyri, hvussu viðkomandi tekur ímóti medisinskari viðgerð, og hvussu ávísar sjúkur raka. Kortleggingin av genominum er tí ein týðandi liður í menningini av persónlagaðum medisini.

Eitt av aðalendamálunum við FarGen hevur frá byrjan verið at skapa grundarlag fyri persónlagaðum medisini í Føroyum. Eftir ætlan verða fyrstu genomini frá FarGen lisin hjá Genomisk Medicin seinni í ár.