At FM gullið í mansfótbólti í ár endar í Klaksvík er eingin ivi um. KÍ tykist at vera flúgvandi og í dag setti liðið málmet.
Við 5-0 sigrinum á B68 er KÍ komið uppá 83 vunnin mál í hesum kappingarárinum og tað er met, hóast seks umfør eru eftir at leika.
Í fjør hevði FM vinnarin HB 81 vunnin mál og var tað nýtt met.
HB átti gamla metið sum var 68 mál (2013).
Men KÍ fer í ár helst eisini at seta met við fægst taptum málum í einum kappingarári.
B36 eigur gamla metið frá 2005. Tá tapti B36 bert 17 mál.
Í ár eru bert seks mál farin ígjøgnum hjá KÍ í 21 dystum.
Tað er lítið sannlíkt at klaksvíkingar lata 11 mál fara ígjøgnum í seinastu seks dystunum.
Liðið hevur helst stinnastu verjuna í landinum.
Spurningurin er um KÍ í ár megnar at taka stigametið sum HB setti í 2018 við 73 stigum.
Teoretiskt kann KÍ røkka 77 stigum í ár, men tað krevur sigur í øllum seks dystunum ið eftir eru at leika.
Um tú veitst okkurt, sum VP ikki veit - skriva so til vp@vp.fo
