Landsfundurin hjá Sambandsflokkinum: Prís-elastisitetur er ein týðandi partur av at standa seg í kappingini móti SAS, sum byrjar at flúgva upp á Føroyar í hesum mánaðinum.

Tað sigur Jóhanna á Bergi, stjóri í Atlantsflogi, ið júst hevur havt eina framløgu á landsfundi Sambandsfloksins á Hotel Vágum.

Prís-elastisitetur snýr seg í høvuðsheitum um at finna rætta prísin á eini vøru – í hesum føri flogferðaseðlum – og at vita í hvønn mun, prísurin ávirkar eftirspurnin...gin.

Ella sagt við øðrum orðum: hvussu bíligir skulu ferðaseðlarnir vera fyri at fáa fólk at flúgva meira?

Hóast stjórin í Atlantsflogi ikki beinleiðis sigur, at ferðaseðlarnir skulu gerast munandi bíligari, so er okkurt, sum bendir á, at tað verður bíligari at ferðast millum Føroyar og Keypmannahavn.

Hinvegin greiðir Jóhanna á Bergi frá, at um ferðaseðlarnir t.d. gerast 100 kr. bíligari, so kostar tað Atlantsflogi uml. 28 milliónir krónur.

Jóhanna á Bergi vísir á, at Atlantsflog stendur á markinum til ein nýggjan veruleika.

Í ár verður útboðið av setrum í flogførunum á flogleiðini millum Føroyar og Danmark nógv økt.

Atlantsflog bjóðar í ár út 257.000 setur í sínum flogførum, men nú SAS eisini kemur á Keypmannahavnar-rutuna, verður samlaða útboðið 378.000 setur árliga.

Stjórin greiðir frá, at júst tað vaksandi útboðið er ein stór avbjóðing. Keypmannahavnar-rutan er grundarsteinurin undir Atlantsflogi, og raksturin skal hanga saman.

Atlantsflog skipar annars – í sambandi við loftvegis kappingina – fyri fleiri nýggjum átøkum.

Ein ferðaseðlaskipan er sett í verk til ungar lesandi føroyingar, og í næstum kemur ein nýggj bonusskipan til øll ferðandi.

Eisini fer Atlantsflog at bjóða fram klippikort til vinnulívsfólk, ið, sum vera man, ferðast meira enn vanligt.