Í morgin, leygardagin tann 8. oktober verður Jóanes Norðberg í Vági 60 ár.

Jóanes er sonur Ásu og Róald Norðberg, og er hann elstur av børnum teirra.

Ása og Róald búðu eitt skifti í Keypmannahavn, har Róald gekk á maskinskúla, og var Jóanes føddur í hesum tíðarskeiðnum í Danmark.

Ása og Róald fluttu síðan aftur til Vágs, har Jóanes vaks upp saman við hinum systkjunum, ið komu eftir hann.

Hini systkini eru Marita, ið er búsitandi í Klaksvík og Rutt, ið er búsitandi í Porkeri.

Jóanes er giftur við Gunnleyg, ið er úr Havnini, og eiga tey børnini Anniku, Eirik og Bárð.

Eftir lokna skúlagongd í Vági í 1974, fór Jóanes í læru hjá Sjúrði Strøm, og stóð hann sveinaroyndina sum maskinsmiður í 1978.

Síðan fór hann á maskinskúla í Havnini og var liðugur har í 1980. Í 1981 fór hann til Danmarkar á skúla og tók hann har víðkað maskinmeistaraprógv.

Eftir hetta var Jóanes nakrar túrar til skips við m.ø. Polarborgunum og Svalbard.

Í juni í 1982 fekk Jóanes starv hjá SEV og hevur hann starvast har síðan tá. Seinastu árini hevur hann verið verkstjóri hjá SEV í Suðuroynni.

Jóanes er sera dugnaligur og fittur í hondunum og sæst hetta aftur í øllum, sum hann hevur við at gera.

Í frítíðini er Jóanes ofta á floti í sera snøgga báti sínum saman við synunum.

Í samkomuni í Bethel er Jóanes ein trúgvur stuðul, bæði tá tað kemur til møtini og til viðlíkahald av samkomubygninginum.

Ynskt verður Jóanesi hjartaliga tillukku við degnum og Guds signing í komandi døgum.

Føðingardagurin verður hildin heima hjá Jóanes og Gunnleyg, Geilin 5,  í morgin, leygardagin tann 8. oktober, frá klokkan 16.

Vinir