Tórshavn.fo: Familjudagur, fjølmentanardansur, dansiverkstovur, myndlistaframsýning, matverkstova, bindiverkstaður, søgukvøld, tónleikaframførslur og mangt annað er at uppliva, tá ið Fjølmentanarvikan fer av bakkastokki í Havn tann 25. oktober, sum er næsta fríggjadag.
Fjølmentanarvikan er eitt integratiónsátak, sum Tórshavnar kommuna hevur sett i verk. Í 2022 fekk átakið heitið Fjølmentanarvikan, Multicultural Week á enskum, og fekk tá tað skap, hon hevur í dag. Fjølmentanarvikan er í høvuðsheitum eitt átak, sum hevur til endamáls at viðurkenna, fevna og fagna teimum ymisku mentanunum, sum eru í Føroyum.
Fjølmentanarvikan er karmur um felags upplivingar, sum skapa felags minni og vónandi viðvirkar til at styrkja felagsskapskensluna. Dentur er lagdur á, at vikan skal hava ein jaligan og forvitnisligan anda, og at øll skulu kenna seg vælkomin og trygg. Fjølmentanarvikan hevur ikki ávísa politiska stevnu.
Um tú veitst okkurt, sum VP ikki veit - skriva so til vp@vp.fo
