Tann 14. november 2019 eru liðin tvey ár síðani táverandi fútin John Kølbæk kallaði inn til tíðindafund um skattamálið hjá Eik banka.
Á hesum fundi segði fútin, at málið hevði almennan áhuga og tí fór at fáa høga raðfesting hjá ákæruvaldinum.
Føroyska løgreglan og SØIK í Keypmannahavn skuldu kanna málið.
Nú tvey ár seinni tykist lítið at vera hent í málinum.
VP setur tí fútanum hesar spurningar:
Skilir fútin at fólk halda fútaembætið fer lætt um sannleikan, tá nærum einki lívstekin hoyrist í tvey ár um eitt mál, sum fútin raðfestir høgt?
Tekur fútin nakað menniskjaligt atlit til borgarar, sum møguliga eru ósekir og kortini skulu hava eitt politimál hangandi yvir sær í fleiri ár?
Hevur skattamálið framvegis høga raðfesting hjá fútanum?
Nær kann væntast at fútin tekur støðu til hetta mál?
Hetta er ein oddagrein. VP hevur frælslynta sjónargrein, sum stundum kemur til sjóndar í oddagreinunum.
Um tú veitst okkurt, sum VP ikki veit - skriva so til vp@vp.fo
