Á samkomuni í Evensens Pakkhúsi fara tríggjar kvinnur at leggja fram um teirra leið inn í ferðavinnuna, og hvussu tað gongur. Hvør í sínum lagi hava tær nýliga stovnað fyritøkur og nýggj tilboð til ferðafólk kring landið. Hesar kvinnur eru dømi um tað spírandi virksemi, sum er farið at vaksa saman við økta áhuganum fyri Føroyum sum ferðamáli.

Innanlands ferðavinnan í Føroyum stendur í stórum vøkstri. Fyri nøkrum árum síðani vóru fáir ferðaleiðaratúrar og skipaðar upplivingar til ferðafólk, ið koma til Føroya. Nú ber til hjá ferðafólkum at velja oman fyri 100 ymisk tilboð.   

Nýggir gistingarmøguleikar eru komnir, og fleiri gistingarhús eru ávegis. Eisini upplivingarnar til ferðafólk gerast fleiri í tali við nógvum spennandi at gera á flest øllum oyggjum í landinum. Veitararnir bjóða ferðafólkum fjølbroytt tilboð í náttúruni umframt eitt nú mentanarkvøld og matupplivingar.

Tórshavnar kommuna vil fegin styrkja støðuna hjá ferðavinnuni og serliga menna vinnuferðavinnu í Føroyum. Gestarøðari í Evensens Pakkhúsi fríggjadagin verður borgarstjórin í Tórshavnar kommunu, Annika Olsen.

Allar hesar oman fyri 100 upplivingarnar eru at finna á savningarstaðnum fyri føroysk ferðavinnutilboð, Guide to Faroe Islands. Á síðuni www.guidetofaroeislands.fo/book-trips-holiday kunnu ferðafólk bóka upplivingar, túrar og onnur ferðavinnutilboð frá oman fyri 30 ymiskum føroyskum veitarum. 

Og tað er hetta, ið ferðavinnuveitarar fara at hátíðarhalda á samkomu fríggjadagin 25. januar kl.15. í Evensens Pakkhúsi á Tinganesi. Veitarar og fólk í vinnuni hittast og hita samstundis upp til eitt spennandi ár í føroysku ferðavinnuni.  

Guide to Faroe Islands hevur sum endamál at leggja lunnar undir eina burðardygga og væl skipaða ferðavinnu í Føroyum og leggur seg eftir at fáa ferðavinnuna at blóma kring alt landið, soleiðis at veitarar í øllum krókum í landinum fáa inntøkur og ágóðan av ferðafólkunum. Hugsjónin er tann, at fleiri í framtíðini kunnu bjóða ferðafólkum veitingar og kunnu liva av hesum.  

Guide to Faroe Islands vil í strembanini eftir at hava eina vælvirkandi føroyska ferðavinnu arbeiða tætt saman við myndugleikum og áhugabólkum og laga ferðafólkatilboð og bókingar eftir teirra tørvi og treytum. Vinnuframi hevur veitt fíggjarligan styrk til at menna Guide to Faroe Islands.