POSTA: Eitt nýtt frímerki verður givið út í sambandi við trónuskiftið, sum var í januar. Útgávudagurin er 26. mai, sum er føðingardagurin hjá H.H. Fríðriki 10. kongi.
Frímerkið verður givið út samstundis í Danmark og Grønlandi.
Hetta er aðru ferð at Fríðrikur 10. er avmyndaður á einum føroyskum frímerki – fyrstu ferð var, tá hann giftist Mary drotning fyri 20 árum síðan.
Myndina á frímerkinum hevur Steen Evald tikið, og sett upp hevur Ella Clausen. Umframt myndina sæst eisini navnamerki kongsins á frímerkinum. Leiðaraorðini hjá kongi eru harumframt prentað á tey trý ørkini á ávikavist føroyskum, donskum og grønlendskum.
Les eisini áhugaverdu søgurnar um frímerkini á www.stamps.fo.
Um tú veitst okkurt, sum VP ikki veit - skriva so til vp@vp.fo
