Skúlin við Løgmannabreyt: Foreldraskúli hevur ikki verið vanligur í Føroyum, men í ár er Skúlin við Løgmannabreyt farin undir foreldraskúla.
Foreldur at næmingum í 1. flokki eru tey fyrstu, ið fáa tilboðið um foreldraskúla.
Hóskvøldið 26. august var kunnað um foreldraskúlan, og fyrsta evnið umrøtt.
Av tí at skúlin leggur stóran dent á lesing, fingu børnini hvør sína bók um Herviliga Henry, sum Bókadeildin lat.
- Endamálið við foreldraskúlanum, er at knýta foreldur og lærarar tættari at hvør øðrum, soleiðis at barnið fær optimalar umstøður at trívast í, og á henda hátt fær eina góða skúlagongd. Foreldrini hittast 4 ferðir um árið og er møtiskylda, soleiðis at øll børn hava sama útgangsstøði.
- Umframt at læra hvønn annan at kenna, vera áhugaverdir fyrilestrar á skrá, har foreldur fáa innlit í, hvussu tey best stuðla barninum í skúlagongdini, eins og læring og menning í síni heild verða umrødd, sigur skúlin á síni heimasíðu.
Um tú veitst okkurt, sum VP ikki veit - skriva so til vp@vp.fo
