Borgarstjórin Heðin Mortensen handaði prógvini í gjárkvøldið, tá fimm nýggir klædnastylistar fingu handaði prógv í Posthúskjallaranum. Í stuttari røðu førdi borgarstjórin fram, at føroyska útbúgvingin er á sera høgum altjóða støði.

Borgarstjórin nevndi eisini, at hann við mongum øðrum fegnaðist um, at vit í Havnini kunnu bjóða eina tílíka útbúgving sum hesa.

- Tí eg skilji á øllum brøgdum, at vit ikki bara “eru við” - men at vit á hesum øki eru betri og í fleiri førum skara langt framúr, eisini á altjóða marknaðinum.

- Úrslitini hjá teimum 25, sum samanlagt hava hava tikið tikið útbúgving sum klædnastylistar, sum Sýran Design hevur staðið fyri, eru sjáldsama góð.

- Og tað er eisini gott hjá okkum at vita, at størri helmingurin brúkar sína útbúgving í sínum dagliga arbeiði, og at hetta tí í stóran mun eisini er eitt arbeiðsskapandi átak.

- Eg hoyri eisini, at próvdómarin, Siri Sørensen, sum er blaðstjóri á Kvinnu, sigur, at hon í fleiri førum metir úrslitið so gott, at tað er klárt at koyra í Vogue! Tað er jú bæði ótrúligt og gleðiligt í sjálvum sær!

- Herta er ein fjølbroyttur skari millum 16 og 63, sum hava verið leiddar gjøgnum hesa útbúgving av kønu hondum Katrinu í Geil. Við sær hevur hon eitt ótrúliga spennandi netverk og ráðgevar, sum hvør á sín hátt geva útbúgvingini innihald.

- Og úrslitið er ein útbúgving, sum byggir á objektivitet og kreativitet á høgum altjóða støði. Og stóran týdning man tað eisini hava, at vitanarstøðið innan sjálvt yrkið á henda hátt verður munandi hægri.

- Endamálið er sum kunnugt at menna kreativar og professionellar stylistar, sum hava neyðug amboð, vitan og førleikar at virka bæði í Føroyum og uttanlands.

- Málið er, at luttakararnir eru førir fyri at arbeiða professionelt sum stylistar eftir lokna útbúgving, segði Heðin Mortensen, borgarstjóri, at enda, áðrenn hann handaði prógvini.