Herfyri ljóðaði at Meta, sum er fyritøkan handan sosialar miðlar sum Facebook og Instagram, umhugsar at gevast við at veita tænastu í Europa, tí reglurnar fyri flutning av data eru so truplar.

Men tað er ein misskiljing, ella ein yvirtulking av tí, sum Meta skrivaði í síni seinastu ársfrágreiðing.

- Tað passar ikki. Vit hava sum øll onnur børsskrásett feløg skyldu at upplýsa um ymsar avbjóðingar og hvørjar váðar okkara íleggjarar taka á seg. Hetta hava vit sagt fleiri ferðir áður, vísir felagið á, og sipar til ósemju við ES um, hvussu data kann flytast ímillum ES og USA.

Í seinastu ársfrágreiðing brúkti Meta orðingina, at tað kann blíva "ógjørligt" at bjóða sínum viðskiftafólkum summar tænastur, um ikki ein avtala fæst um flutning av data tvørtur um Atlantshavið.

- Vit hava sjálvandi ongan tørv á at taka okkum úr Europa. Sjálvandi hava vit ikki tað, skrivar felagið í fráboðanini.

Meta hevur havt nakrar truplar dagar á børsinum, seinastu fýra dagarnar hava tølini verið reyð og fallið er tilsamans nærum 32% farnu vikuna.