KVF gjørdi nógv burturúr í heyst at íslendingar umhugsaðu at royna føroysku uppboðssøluna av fiskirættindum.

Vit hoyrdu í KVF, at Høgni Hoydal og Sjúrður Skaale høvdu verið í Íslandi og greitt frá føroysku uppboðssøluni av fiskirættindum. Hetta var uppundir valið í Íslandi.

Hóast báðir eru kendir fyri at hava ómetaliga góðar talugávur, so tykist hesin boðskapur ikki at hava havt serligan áhuga í Íslandi.

Nýggj stjórn er skipað í Íslandi og uppboðssøla verður ikki tikin uppá tungu.

Nýggja stjórnin leggur dent á, at vinnan skal hava góðar karmar, ið skapa langtíðar tryggleika.

Og at skipanin stuðlar framhaldandi virðisskapan.

Men í KVF hoyrist einki um, at íslendingar halda fast í verandi skipan við umsetiligum kvotum og úrslitsgrundaðum tilfeingisgjøldum.

Henda marknaðargrundaða skipan er tann, ið hevur roynst best og er í tráð við teoriirnar hjá altjóða búskaparfrøðingum, sum til dømis Adam Smith.

Men í KVF er tøgn.

Tey hjá KVF vilja partú hava føroysku uppboðssøluna, sum tey markaðarføra saman við kommunistum/sosialistum, sum nú látast at vera reinastu kapitalistar.

Royndaruppboðssølurnar í Føroyum eru miseydnaðar. Antin eru kinesarar farnir við fiskinum ella teir ríkastu reiðararnir.

Tað er torført at vísa á viðkomandi royndir av tílíkum skipanum, við tað at uppboðssølur av fiskirættindum ikki eru royndar enn í okkara grannalondum.

Skipanin var roynd í Russlandi, men fekst ikki at virka sum ætlað.

Ná men gloym Ísland, Noregi, Grønland, Danmark, Russland, Adam Smith, okkara royndir ... vit hava jú okkara heilt serligu frøðingar.

Ikki sannheit KVF.