Tann 3. juli fylti Andrass Samuelsen 150 ár.

Hóast fáur føroyskur politikari hevði so stóran týdning og ávirkan, sum hann hevði, er hann næstan heilt tagdur burtur í flestu media.

Vit vita øll, hví tað er so.

Orsøkin er tann ússaliga øvundsjukan, ti hann var sambandsfólk.

Sjálvt ein undangongumaður, sum setti ta politisku dagsskránna í næstan eina hálva øld, verður søguliga lopin um, ti nationalistarnir ikki dáma hann.

Tað er sera løgin søga við stórari slagsíðu.

Tað er ein háð moti øllum teimum mongu føroyingum, sum heldur valdu Andrass enn Jóannes Patursson, sum teir ikki høvdu sama  álit á.

Andrass fekk fleiri stemmur og meira viðhald, ti hann var ein meistarligur debattørur, sum fundarfólki dámdi og valdu.

Tey litu á hann, og hann setti næstan altíð mótstøðumenn fastar við logiskum argumentum og brosandi ironi.

Undir krígnum høvdu Louis Zachariassen, Petur Mohr Dam og Andrass Samuelsen eitt fyrimyndarligt pragmatiskt samarbeiði í Landsnevndini, sum avgjørt bjargaði Føroyum.

Teir vóru ymsir av lyndi, men bæði Louis og Petur Mohr vóru hugtiknir av tí gløgga og hábærsliga veteraninum.

Hann var bæði nestor og mentor.

Virgar Tórarson Dalsgaard