- Á hvør uppliving! Eg eri púra málleysur. Havi sera torført við at seta orð á allar kenslurnar, men vildi so ynskt at eg dugi at siga tykkum øllum frá tí eg føli. Hvussu ómetaliga takksamur eg eri fyri allan stuðul og hjálp. Tað var so ofta at eg føldi at eg dugdi ov illa at siga, ella vísa hvussu takksamur eg var fyri alt tit hava gjørt fyri meg.

Soleiðis skrivar Jákup Petur Eliassen í eini dagføring á sínum facebookvanga, eftir at hann hevur sodnað bragdið hann og Ken Bærendsen gjørdu í gjár og síðstu nátt við at ganga ein sonevndan Everesting túr - t.e. at ganga upp á Slættaratind so ofta, at tað í longd svarar til at fara upp á heimsins hægsta fjall.

Tað bleiv til 18 túrar tilsamans, og endamálið var eisini at skaffa pening til Eydnudeildina, sum er hondbóltsfelag fyri børn við serligum tørvi.

Jákup Petur Eliassen upplýsir hesi tøl frá túrinum:

Hæddarmetrar: 8.945m, Samla longd: 65.47 km, Tíð: 24:42:41, Brendar kaloriur: 9.918, Fet: 123.312 samla. 68.153 fríggjadagin, og 55.159 leygardagin, Tíð oman og niðan: Skjótasti túrur 54:36, seinasti túrur 1:32:08.

_{myndir: Egnar / facebook}