Det Ferösche Compagnie: Det Ferösche Compagnie hevur fingið játtað 500.000kr frá Bikubefonden undir puljuni Dialog: Koncept: Udvikling.

Bikubenfonden hevur valt at stuðla DFC við tí endamáli at styrkja bólkin í sínari framhaldandi menning. Tað verður m.a. gjørt við at fara undir eina tilgongd við fokus á strategi, organisatión og professionalisering.

DFC setir sostatt skjøtil á eina spennandi menningartilgongd, har endamálið er at víðka um sítt virksemi uttanlanda og finna samstarvspartnarar, sum kann menna DFC listaliga og verða føroysku leiklistini at gagni. Eisini er ambitiónin at tilbúgva bólkin, so DFC kann hava eitt støðugt virksemið

Altjóða palllistafestivalar og sjónleikahús hava víst áhuga í bólkinum. Eitt nú hevur Lykkenborg (Castle of Joy) verið spældur á The Barbican í London fyrr í ár, har leikurin var sera væl móttikin. Det Ferösche Compagnie bleiv stovnað í 2010 og hevur framleitt 8 leikverk og fleiri afturat eru i stoypiskeiðini. Umframt at hava spælt í Føroyum, hava fleiri av leikunum verið sýndir í Danmark, Norra, Írlandi, Columbia og London. Og nú tá Bikubenfonden hevur játtað 500.000kr í stuðuli til bólkin, kann DFC staðfesta, at tað veruliga er áhugi í føroyskari leiklist, og at DFC hevur menningarmøguleikar til at blíva ein altjóða palllistabólkur við fundamenti í Føroyum – bæði listaliga og fysiskt. 

Limirnir í Det Ferösche Compagnie eru sera errin og takksom um hesa viðurkenning frá Bikubefonden og gleða seg til at fara undir hesa tilgongdina og sostatt skapa fleiri viðkomandi og slóðbrótandi leikir her heima og úti í heim - og fáa heimin til Føroyar. 

Kjarnulimirnir í Det Ferösche Compagnie eru: Kristina Sørensen Ougaard, Búi Dam, Jens L. Thomsen, Durita Sumberg, Dánjal á Neystabø, Sámal Blak, Kjartan Hansen

Leinkja til Bikubefonden www.bikubefonden.dk

Det Ferösche Compagnie www.dfc.fo