Skúlablaðið: Eins og í øðrum skúlum kring landið er eingin vanlig skúlagongd í Skúlanum við Løgmannabreyt í Hoyvík, men hóast so er, er nógv virksemi á skúlabókasavninum. Foreldur at næmingunum í ymsu árgangunum hava høvi at koma í skúlan ávísar tíðir í vikuni eftir bókum til børn síni og við bókum, sum børnini hava lænt. Alt er sjálvandi gjørt eftir forskriftum, sum heilsumyndugleikarnir hava ásett við at halda neyðuga frástøðu, at ikki vera fleiri í tali í sama rúmi í senn, og at tað verður væl og virðiliga sprittað við komu og fráferð.

- Vit hava gjørt eina skipan, har tíðir eru settar til foreldrini at koma í skúlan. Lærararnir stýra skipanini, soleiðis at lagt verður uppfyri, at tað ikki koma fleiri í senn. Ein lærari er hjástaddur at hjálpa foreldrunum at finna bøkur fram, og skúlabókavørður er eisini hjástaddur, so alt verður farið rætt fram, og bøkurnar verða skrásettar, sigur Birna Gaard, skúlabókavørður í skúlanum.

Bøkurnar, foreldrini koma eftir, eru bøkur til frílesingarløturnar heima. Í flestu flokkum fáa næmingarnir ein heimasetning at gera hvønn dag, umframt ymiskt at lesa.

Les meira